سلسلة قصائد بالعامية

ممنوع مادمت عربى

ممنوع عبادة الأوطان..
ممنوع تعيش فِ الحياة..
تِشبه بَني الإنسان
ممنوع تحت الشموس
تحلم بحَبِّة ضِل
ممنوع فى ضي القمر
تلضُم قصايد فـُل
إياك تتكلم
إياك تتألم
أحسن لك استسلم
طول مانت عايش عـربى
ممنوع تعـَلـِّـى الصوت
مطلوب مِنك فقط…
تتهَجَى كلمة "سكوت"
مطلوب منك فقط…
تؤدى دور الموت
اللى إنكتب للعربى
***
ممنوع عليك تصحى
ممنوع عليك تحلم
ممنوع عليك تحيا
ممنوع عليك تنطق
ممنوع عليك تنقد
فصول المسرحية
احفظ دورك وذاكِر
جوانب الشخصية
مرسوم دورك بدِينـك…
تبقى فى المسرحية…
أدوارك إرهابية
إياك تقول سلام…
إياك تقول شَـرعية
ممنوع عليك تناضل
ممنوع عليك تجادل
ممنوع عليك تدافع
التهمة ثابته عليك
وعلى كل واحد عايش
بديانة إسلامية
………….
كومبارس بنبقى دايما
فى معارك الدّولية
وبنندبح وندفع
للى دبحنا الديّة
طمعان فى خير بلادنا…
والثروة البتروليّة
يسرق أحلام ولادنا
ويقول …. إرهابية
مايستاهلوش يعيشوا
على الكرة الأرضية
وتحت شعار حقوق
ونشر ديمقراطية
يبقى حق العرب
إبادة… جماعية
……….
يا ضمير الكون يا صاحى
تعالى شوف مين فينا
حضارته ارهابية
وشعاره الهمجية
تعالى قول مين عايش
بثقافة بربرية .

قصيدة دم العرب
دم العرب هدروه

والكل وقفوا خرس

حتى الصراخ نسيوه

والصرخة صبحت همس

محتار يا دم العرب

بين البقاء والطمس

مشنوق يا فجر احلامنا

على جراح الأمس

وإمتى يا بكرة هاتيجى

وتجيب لنا معاك شمس

ملعون يا جبن الحزانى

ملعون يا بيع الرخص

ملعونة كلمة خيانة

ملعونة قولة " بس "

ملعون أبو الخوف يانا

ملعون يا طمع النفوس

ملعون يا عبد الفلوس

ملعون يا قهر الكل

ملعون يا وسط الحل

ملعون أبو كل حكمة

تستحلى طعم الذل .

الاهه مجنونه
مَفِيش أَلَم عَاقِل
ولا جَرْح لُه مَعْنَى
ولا حَاجَة تِسْتَاهِل
تِجْرِى لْهَا يَا دْمُوعْنَا
والآهَة مَجْنُونَة
نِكْتِمْهَا تِوْجَعْنَا…
نِطْلِقْهَا تِوْجَعْنَا
مَكْتُوب عَلِينا كِدَه
نِعْيش بأَوجَاعْنَا
لا نِلْقَى ضِلِّة دُوحْ
ولا ضَمِير لِلْبُوحْ
ولا قَلْب يسْمَعْنَا
ونَصِيب سَاعَات بيْرُوح
ولا يُوَدَّعْنَا
ولِسَه قَادْرِين نِضْحَك
فِى عِز مَدَامِعْنَا
صَابْرِين عَليِك يا قَدَر
مِنْ غِير مَا نِسْأَل يُوم
لا لِيه ولا إِشْمِعَْنَى !

تِبْقَى وَحِيد!

تِعْرَفْ ؟

لَمَّا تْعَدِّى عَلِيك الفَرْحَة….
ومَاتِفْرَحْش
لَمَّا الدَمْعَة تسِيل عَلَى خَدَك
ومَاتِنْشَفْش
لَمَّا الْغُرْبَة تِمْلا ضُلُوعَك
وتِلْقَى الدُنْيَا
مَا بْتِنْطَاقْش
لَمَّا لْسَانَك يِكْرَه صَمُْه
ومَايِنْطَقْش
لَمَّا حَنَان يِفِيض مِنْ قَلْبَك
ولا يِطْلَعْش

تِبْقَى وَحِيد.

الجوع بيصحى الكرامه
الحضن جوة الحضن ناشع دم
والجرح منه لجرح … مش عارفين
الدم اللى نازف دا … من مين ؟
م الأم اللى شايلة ابنها فى حضنها
ولا دم رضيع بيبكى ع الإيدين
الدم … نفس الدم سايل منهم
والجرح … نفس الجرح دابح قلبهم
والدمع … نفس الدمع غرق خدهم
والآهه تطلع لأه من صدرهم
والدم يتحول جهاد
والدمع يتحول عناد
والصبر على موت الولاد
والصبر لو عاشوا الولاد
والظلم بيفجر عدالة
والأكل لو ودى لمنامة
الجوع بيصحى الكرامة
لما يفقدها العباد
والأرض لو داسها الخسيس
تبقى الحياة ثمن رخيص
عمره ما يغلا ف يوم على
حب البلاد .

السكوت ممنوع
لما انت بتعرف تتكلم
طب ساكت ليه!!
خايف تصرخ أو تتألم
ما تقول من إيه..
أصبح من حقك ترفضني
تقدر تتحاور وتفدني
فيك انت هشوف نفسي كويس
من غير تلوين
وهتعرف نفسك وتميز
بعنيك لتنين
نفسي تقول لأه بعلو نداك
نفسي بحرية أقول وياك
لما تقول لأه بأعلى الصوت
أنا فعلا هسمع صوتي معاك
بس انت اتكلم من قلبك
ولا تخضع يوم إلا لربك
لو فاكر لسه زمان موجود
تبقى بتحلم
أو ليل الظلم ملهش حدود
مش راح تسلم
فتح عينك تسمع وتشوف
إيه اتغير ف. الكون حواليك
وارفع صوتك تجتاز الخوف
الدنيا بحالها هتسمع ليك
متخفش بجد
دا سكوتك مش راح ينفع حد
واتناقش رد
كل سدودك بإيديك تنهد
ممنوع الخوف وبلاها سكوت
رأيك من حق بلادي عليك
قول لأه وأيوه بأعلى الصوت
بحياتي وروحي وقلبي افديك
ممنوع تسكت.. أرجوك ممنوع

لا الشمس قِدمت...
ولا القمر ملّ الطلوع!
جيهان الشعراوي
كل يوم ننام على ضي القمر
ونقوم على شمس وسطوع

نكبر سنين من الدموع...

تصفى الحياه... تقلب غيوم

ويعدي يوم

نـِشـعـِل شموع... تخلص شموع

لا الشمس قِدمت... ولا القمر مَلّ الطلوع

نندم على الماضي اللي راح

ونخـاف قـوي م اللي جاي

ننسى يومنا اللي احنا فيه

والماضي راح ونـقـول ده جاي

نقتل عشـــــانه بكـــــره البــراح

ونقول دا كان... مالـُهْـش زَي

لا مننا بنحيى اللي مات ولا داوينا اللي لسه حي

دوارين في سواقي جفت من زمان ما فيها مَيّ

نتوه ما بين شك وملام

نشعل حرايق م الكلام... تطرح ضلام

وسحاب دُخَان... تخنقنا بيه

ولا عمرها راح تدِّي ضي.

جميلة جدا وشكرا

أخر كلام
بعد مابقلع هدومى
قبل نومى
لازم أقرا كام مقاله
نرفزونى..سخنونى
حفزونى..إنى أكتب
عن ولاد الكلب
والسفاح شارون
قول سهرت
نمت..بعد الفجر ما إدن
والعيال بيقومونى
صحصحونى
قمت مفزوع من منامى
هجت فيهم
جت مراتى قالت لى..مالك
إيه جرالك؟
ليه بتشخط فى العيال
قلت باحلم
كنت باحلم إنى ميت وانفزعت
انبسطى..؟
كشرت وبسرعة قالت:
إيه دا أصله. طب وماله
يستحق الموت وأكثر
اللى يهرب من عياله
كنت فين م المغربية؟
تيجى بعد الفجر مادن؟
إنت فاكر إن دا ح يخيل على
شعر إيه؟
واللا إيه بتهببه.. وتقول قضيه
هى فين هى القضيه؟
هم يعنى كلمتينك.. اللى حى يحلوا
القضية؟
هيه ناقصة
وإحنا مالنا
ما انت شايف . كله خايف
والمدافع همسه حايره..عالشفايف
وانت عارف
الصهاينة ناس قويه.. ومفتريه
واللى أدهى من داكله
لما يبقى الكل نايم.. وانت قال تكتب
قصيده!!
عن ولاد الكلب والسفاح شارون
أبقى نايمه!!
أسمعك بتقول شارون؟
من غير سلام ولا يحزنون!
انت فاهم إنه ح يهمه الكلام؟
واللا دول عايزين سلام؟
واللا ح يخاف من كلام؟
هو همه من كلينتون. واللابوش
واللاهمه من باراك.. واللاهمه من...!
واللا عايز تبقى شاعر؟
واللا من أبنود جنابك؟
واللا عايز تقديريه؟
قلت طبعاً
أى شاعر يستحق التقديريه
يستاهلها عن جداره
مش خساره
ليه يا خويا
هو طلع إسرائيل؟
واللا عمر فى الصحارا
حاجه تانيه!!
والقطاع العام بيخسر
كان منع عنه الخساره؟
واللاسكان المقابر
كان بنالهم كام عماره؟
واللاشغل ألف عامل
أو منعهم من الدواره؟
واللا وزع عالغلابة
ألف طن من الدقيق
واللاحتى كام شيكاره؟
فوق لروحك
هو خدها عن وهيبه
والأغانى لعبد حليم
مش عشان حل القضيه
القضية هى.. هى
واحنا فى الخيبه القويه!
قلت جاهله.
إنتى جاهله
انتى فاكره الشعر ساهل؟
دا اللى ينكر فضل شاعر
يبقى جاهل
قلبك ابيض
مش حترجع الا لما يحبسوك
عالكبر ويبهدلوك
انت بتقول يا سادتنا يا قادتنا..
ارفضوا تهديد أمريكا والتحيز لليهود؟
طب ولو زعلت أمريكا
طب منين حيأكلونا؟
والحكومة نفسها بتمد إيدها
ويقولوا لهم شحتونا!!
انت عايز يحبسونا ؟
لوعايزنا نقب اكتب
حط همك فى الأغانى
فطر الشعب بأغانى
نيم الشعب باغانى
والأغانى..
بيبعوها بالدولار الأمريكانى
واللا يعنى جت علينا
واشتهينا الفقر.. تانى؟
عيش وهيص
شجع الأبطال ولادنا
اللى رفعوا راس بلدنا
مسخروا أولاد ناميبيا
واللا ليبيا.
عيش وهيص..
انت يعنى كنت غاندى..؟
واللا حافظ واللا شوقى؟
واللا بيرم أو جاهين؟
مانت طول عمرك بتكتب!
حد سمعك؟
قول لى مين؟
والا كام واحد بيحضر
فى النداوى ف أى حته
حتلاقيهم..خمسه سته!
أما لو تكتب أغانى
تبقى نجم ولك سماك
واللى جاى يطلب لقاك
واللى يتصور معاك
والصحافة والإذاعه
والبرامج..
كله ح يسجل معاك
زى شعبان عبدالرحيم
واللا شوف جمهور حكيم
تبقى شاعر زى صاحبك
كل واحد يرضى عنك
الحكومه والصهاينه والخلايجه
والتوانسه
والاجانب والذوات
بالخصوص صنف البنات
هو دا آخر كلامى
تمشى بيه.. أو تفارق من سكات
ميت يمين ماتقول قصيده
لاملا كل الدار صوات
واللى يسأل تانى عنك
راح اقول له غار ومات!
***
الشيخ امين الديب

جميل جدا ربنا يوفقك