اوبريت حب بلدى

اوبريت حب بلادى
(الاستعراض)
صباح نادى على بلدى
بيشرب فل من بلدى
وفجره يطل على بلدى
ويزرع عزوتى وسندى
*************
صباح فتاح صبايا ملاح
زهور تفاح وانام وارتاح
فى شط النيل فى حبه اسير
وحبى دليل عشان بلدى
************
ادافع عنها يوم ورا يوم
ولا ابعد عنها ابدا يوم
وروحى دى فدا بلدى
وحبى دليل عشان بلدى
يدخل الحاكى.......
القناعة والكفاح

الواد عوضين ابن الحاج عويضة- قال عايز يبقى اغنى من العمدة صميدة
كان عنده ارض مليانة خير- ومحصولها اكتر من ارض الغير
قعد يحسبها- ليله بطولها
عايز فلوس تيجى معايا هبولى
واشوف نفسى واعمل زى الحاج متولى
يجيبها يمين يجيبها شمال- لو باعها زراعية يقل المال
قال ابورها- لجل يزيد مالها- وابعها مبانى- ومين يبقى قدى تانى
وبارت ارضه سنه اتنين ماسك على نفسه- واستنى كتيير للى يجى يشتريها منه
بس يا خسارة فى بعها ما كانشى رزقه- وجه يزرعها تانى بعد ما ضاقت عيشتة
قل خيرها وبقت اضعف من غيرها
لو كل واحد باع ارضه- ونسى زرعه يبقى هناكل منين ياعوضين -
ولا نشوف حد يسلفنا قمحتين
(الاستعراض)
فلاح-وزراعتى دى غية
مرتاح-وارضى فى عنيه
يلا-مد ايدك شمر
للخير-هتخده وتعمر
لونها بالخضرة
خليها لك عزوة
دا الارض لك سترة
راعيها بك تكبر
يدخل الحاكى........
فائدة العلم
الحاج سلام – راجل همام- بس عيبه العلام
يقعد يقول – كدا على طول-العلم فى الراس مش فى الكراس
ونصحه كتييير الاستاذ سليم
ياحاج مافيش احسن من التعليم
خلى عندك شجاعة وارادة قويه – واكتب اسمك فى محو الاميه
كان يضحك عليه الحاج سلام ويقول راسى اعلم من اى علام
وفى البوسطجى خبط ع الباب افتح يا سلام افتح ياسلام
لك عندى جواب حلو من ابنك علام
قالة سلام طب افتحه ليا واقراه عليا
بيقولك علام انه بخير وبعتلك فى الجواب كل الخيير
وفرلك فلوس الارض – عشان متحتجش لحد
وبعتلك الحوالة بالمعلوم –بس خلى الامر دا مكتوم
فرح سلام وقال ياسلام ياسلام بس اشترى بالورقة دى ازاى
قاله البوسطجى ممكن ابدلهالك بفلوس واجبها لحد عندك
هات ختمك وارتاح ياحاج دا انا زى ابنك
واستنى سلام يوم اتنين ايام وايام
ان البوسطجى يجيب الفلوس دا فص ملح وداب
ميعرفش سلام ان البوسطجى بقى من الاعيان وامتلك الاطيان من فلوس علام
يا حاج سلام الخير اكيد فى العلام
لو روحت فى محو الامية ماكنتش وقعت فى البلوى دية
العلم فى الراس والكراس
الاستعراض
مسكت الكتاب وقريت - وفوق الخطر خطيت
من الظلام للنور - لبر الامان عديت
يا امّىِّ مستنى ايه – لغيرك يضحك عليك
نوّر طريقك يلا – بالعلم وامشى فيه
الماضى ليك ظلام- امشى بقى لقدام
خلى المستقبل احلى – بخطوة للامام
**********************
مش عيب محو الامية – ولا ضحك الخلق عليا
العيب من جهلى اسيب- نصاب يلعب عليا
اقرا دا بأمر الله – والجهل لازم تنساه
العلم نور الحياة – دى وصايا رسول الله
يدخل الحاكى........
التعصب الدينى:-
قال نصر مابيحبش احمدواحمد بيكره نصر
قاعدين كدا سوا فى الفصل- من الصبح لحد العصر
كل يوم فى الفسحة زعيق - كل يوم خارجين فى خناق
والفصل انقسم حزبين - حزب لاحمد وحزب لنصر
والاستاذ غلب معاهم واتعصر بينهم عصر
وفى يوم عملت المدرسة مسابقة وهتدى الجايزة لاحسن فصل
وكل واحد قعد يزين ويرسم حتى احمد حتى نصر
وكان فصل جميييل- بس عيبة احزاب الفصل
وقبل المسابقة بيومين - غاب كل الفصل الا اتنين
وفى الفصل وهما قاعدين - هجم عليهم عيال تانيين
قال احمد قال نصرهتخربوا الزينة وتبوظوا الفصل
قاموا ايد واحدة ودافعوا بروح واحدة عن تعبهم وعن فصلهم ونجحوا فى انقاذ الفصل
حضنوا بعض وعرفوا ان مافيش فرق بين احمد وبين نصر كلنا اخوات بندافع عن الفصل الى جوه مصر))

الاستعراض))

هلال صليب دى مصرنا بلد الامان
عايشين كدا مع بعضنا هنا من زمان
مسلم مسيحى بقلب واحد ع الدوام
ايدك فى ايدى يلا نبنى حياة امان
زى ماناخد منها ندى كمان
دى مصرنا ضى عينينا والامان
بالوحدة بينا اكيد هنفضل للامام
ايدك فى ايدى يلا نبنى حياة امان

الاعداد والاخراج:- أسماء الجمل
الموسيقى:- نشوى محى الدين
التأليف :- أ/بكر عمر، أسماء الجمل

مشاركه متميزة من الاستاذه اسماء وابداع فى النص من سيادتك انت والاستاذ بكر ونتمنى مشاركات مفيدة دائما ولعل الباقى يفهم مامعنى منتدى للمسرح
شكررررررررررررررررررررا

اشكرك استاذى الفاضل
فان لم يفهم الجمع
اكييد ستظل تناضل

نحن بالفعل نناضل من اجل ان يفهم الجميع ان المسرح هو الباب الوحيد المتاح لعرض مايجول بخاطر كل منا باسلوب ما .وعرض ذلك امام الناس فى اطار معين او نص معين نحاكى به الظروف المحيطه حسب رغبة الكاتب او المعد لهذا للعمل
مع الشكر

شكرا على المجهود الطيب

اشكرك على مرورك الكريم

ماشاء الله
اوبريت جميل جدآ
والاسلوب شيق قوى وممتع جدآ
ربنا يوفقك