ديوان الشاعرة (جيهان الشعراوى)

بنت مِـين فِى مَـصر ؟!

سـألنى:
- انتِ منين ؟
قلت له - مـن مَصر
سأل - يَعْـنى مِنـْين فِ مصر؟!
قلت- مِن كل حِـتة فِ مَصر
سأل- طـَبْ بنت مِين فِ مصر ؟
- قـُلت لـه:
- بنت مَصر كلها….
بنت كل أهلها….
بنت كـل شِبر ف أرضها
من طـُولها لو ضربُته
ف عَرضها
وبعدين قـْـسمته عـلى شعْـبَها
بنت الشوارع والحارات
و الـقصور والكـفـور
والنـجوع والربـوع
و العِشـش والعـوامات
بنت الكنايس والجوامع
و النواصي والكباري
والموالد والساحات
بنت الأُصول والأكابروالذوات
بنت ناسنا الطـَيـْبـيـن
المخلِصين المظــلـومـين
الصابرين رغـم الآهَـات
بنت بَحَري والصعيِد
و القـنال وبورسعيد
بنت القَديم والجديد
و الشَـقـا المَصْـلوب والعـزم الحـديد
بنت النـوبه والفـلاحين
و السواحليه الفراوده الصيادين
والبَدو الطيابه الرحَّّـالين
بنت الصحرَا وبنت الطين
بنت الفـواعْـليه الغلابه الشـيَّالين
النجّارين والحدَّادين والبنـَايِيـن
طالعْين يحَاربوا فى الخـراب
ويَّا قـصْعـَه ومـَسْطـَرين
بنت الفـَاتـْحه للأولـياء
والسـيده وسـيـدنا الحـُسـين
بنـت الشكـوى لـو تِنـْـكـتم
ويَّا رفـْـعِة الجبْيـن
ومُكافـْحة الظـُـلـم اللعِـين
والاسْـتِـسْلام .. غِـير المُهـين
اسْـتِسْـلام ابن اليَـقـيـن
بإن الدُنـيا مهْـزلـه
مـقَـَضِّيِينـها حـتى حِيـن
دنـيا زي مَـضْـيَـفـه
وإحـْنـا مِنـها مرَوّحيـن
…………………..
بنـت الحُـدود المقـفــولـين
عـلى مُربَع مُنـْحرِف
عـلى أرض سـينا
اللي نايِمـه
جُـوا حُضن بحور حـنين
بنـت الجبال والبَرَارى
والآبـاروالنخـلتيـن……
شَامْْخِـين يِغـَـنـُـوا لحن الحَصَاد
جُوز وتيْـن
بنت مزارع الزتـُون والعنب
في جبال كاترين
بنت حلايب في الجنوب
والواحات المنسيين
بنت المراسي والسُفن والمَلاحِـين
بنت المراكِب أم الشرَاع
والفــلـُوكه بمجْدَافـين
بنت البَراح على الشُطوط
بعد العصارى والشماسي مروحين
[center][center]
عسكرى أمن مركزى

الوِش طيب قوي
والعيون عـَسَلي
بايـِّنـُه حُكم القوي
عليك أيا ولدي
النظرة م الطيبه
والبشره خـَمْرِيه
من رعبيعلى ولدي
باكيه دِمَا عـِنيـَّا
…………………..
مـَجـْـبُـور تحارِب أخوك
والجَـبْـر ماعليه حساب
لاجل الأمان علِّموك
تكتم صِراخ الشباب

اهداء

اهداء … لكُل النَاس
ِللى حَطْ ف طَرِيقى سُدُود
عِرفت إزَّاى أَخَطِيها
والِلى فَرَشلى السِكة وُرود
عَلِّمْنِى إزَّاى أَندِّيها
والِلى وَهَبلى مَشَاعِر حُب
عَلِّمْنى إزََّاى أنا أَدِّيها
واللى زَرَع فى القَلب جِراح
عِرفْت إزَّاى أَدَاويها
واللى خَلَّى الحَيَاه أنغَام
عَلِّمنِى إزَّاى أَغَنِّيها
واللى طَرَح ع الخَد دُمُوع
عَرَّفِنى إمْتَى أَغَلِّيها
واللى زَرَع فى سَمايا نُجُوم
عَلِّمنى أَهْتِدى بيها
واللى كَشَف للعِين أَسْرَار
عَلِّمْنِى إزَّاى أَشُوف بيها
واللى زَرَع شُوك فِى الأحْلام
عَوِّدْنِى احْتِمى فِيها

تحدِّي

لَو كُنتْ فَارِس

ولسَّه قادِر تمْتِطِى

صَهْوِة فؤَادَك

إمْتِطِيه….

واِرْمَح وَرَايا

تحذير

الكِلمَة ….

ع اللى بِيقولها

تِدِل

والقَلم…

ع اللى يِكتِب بِيه

شَهِيد!

بِدَايَة

إِطْلِق للمَدَى رُوحَك …

تِصِير حُرَّه

دَاوِى بِالرِضَا جُرُوحَك …

تِصِير ذِكرَى

وإنْ جَرَحَك ف مَرَّة حَبيب …

إيَّاك تِكرَه

دَا الكُرْه لَو عَاش فِيك اليُوم …

يِقْتِلَك بُكرَه.

بنات الرُوحْ

دِى لا أَشْعَار ولا قَافيَه ولا تَفاعِيل

دِى مَشَاعِر بَنَات الرُوحْ

لقلب بِيعْشَق المَواوِيل

حَبِّة مَسَائِل تِشْغِلنِى

تِصحِِّينى فى عِزْ الِليل

تِسَهَّرْنِى…تحَيَّرْنِى

وتِئلِمْنِى وتِكسَرْنِى

لَكِن بَرْضُه

تِصَبَّرنِى..تِحَرَّرنى

تِقِيد فى ضَلام ليِلي

الكَلام قَنَادِيل.

بَرَاح الرُوح

البَرَاحْ …

هُوَّ بِيت الرُوحْ

والبَدَن …

سِجْنَها

والحَوَاس …

سَجَّانهَا

البَرَاحْ…

هُوَّ عِشْق الرُوح

والفضَا …

بَحْرَها

والسَمَا …

عِنوَانهَا

بَرَاحْ ضِيِقْ

" آَه يَا بَرَاح عَمَّال بِيْضِيق "

لِحَد مَا جَارعَلى نفُوسْنَا

برَاح ضَيَاعْ

" آَه يَا بَرَاح عَمَّال بِيْزِيد"

لِحَد مَا تَاه وتَوهنا

الوَرْد … إعْرَفُوه !

قَبل مَا تِزْرَعُوا الوَرد إعْرَفوه

وحِسّوا إحِسَاسُه الدَفِين

قَبل مَا تِرْوُوا الوَرد مَيَّه

إرْوُوه هَنَا وحُب وحَنْيِن

ولمَّا تِرعُوا الوَرْد حِسّوا

خَضَار عِيدانُه حَانِنْ لِمين

قَبل مَا تقطفوا الوَرد إسْألوه

إنْ كَان هَايفرَح….

ولاّ هَايِقضِى عُمْرُه حَزِين

قَبل مَا تبِيعُوا الوَرد إسْألوه

يُروح لِمين ؟

يُرُوح لِلي بحُب يِدَاويِه

وَلاَّ يُرُوح…

يِدَاوِى هُوَّ المَجْرُوحِين

عَايز قُلوب عَاشقه ترَاعِيه

وللا يُرُوح…

يرَاعِى هُوَّ المَحْرُومِين

يُرُوح يوَاسِى فى الحَزَانَى

وللا يِهَّنِى الفَرْحَانِين

قَبل مَا تِشْتِرُوا الوَرد

إعْرَفُوه…

وعَرَّفُوه…

تِبْقُوله مِيْن ؟!

أَمَرْ الزَمَان

أَمَرْ الزَمَان رَغْم الرِضَا

عَلَى عِبَاد تِشْقَى

وعَلَى عِبَاد تَانيين …

تَاخُد ومَا بتِرْضَى

أَمَر الزَمَان

عَلى ناس

تِعِيش وِحْدَه

وخَلىَ نَاس تانِيين

بِالصُحْبَه نَاس جَاحْدَه

أَمَر الزَمَان

عَلى ناس تِدُوق

المُر .. وتـآمِـن

وخَلىَ نَاس تَانْيين

رَغْم الهَنَا …

كَافْره!

كُمَام نَاقْصَة

الرِزْق لو حَب الخِفِيِّه

يمِيل التـُقل للصَنْعَه

والشَبَك لو صَاد بُلطِيه

دا يبْقَى حَظ مُش صَنْعَه

والفرْصَه لو كَتْ لَكْ جَايه

إِيَّاك تكون مِنك ضَايعه

وأمَا يِدِّيك النَصِيب

ماتِتمَناش نَصِيب غِيرَك

دا الطمّاع مَهْمَا رُزِق

بيبَات قَـَمِيص بكمَام نَاقصَه.

خَاف..!

مَاتنادِيشْ عَلى الأحْلام تِجِيلك…

قوُم رُوح لَها

ولا تِستنى الحَياة تِدِّيلك…

خُد مِنها

واختَار مَوقِفَك مِنهَا…

يَا تكون حُر فِيها

يَا تعِيش عَبْد لهَا

وإن ضِحْكِتَلك مَرَة

خَاف…

خَاف قوِى مِن غَدر

مش عَايْزَة حَاجَة

يا دُنيَا بِتجِيبى اللى مَا بِنرِيدهُم لِيه؟

وبتِبْعِدِى اللى تكون النِيِّه عَلِيه؟

ولمَّا نِسْتَغنَى تِرْجَعِى تَانِى تِجِبيه

يا دُنيا إيِه قَصْدِك بَقى قولِيلى …

بِتِلعَبى بِينَا تَمَّلِى لِيه؟

يا دُنيَا بَقى فوُقِى واعْرَفِى أَنَا إيَه !!

أنَا اللِى فى عُرُوقِى طَرَح الهَوَى حَوَادِيت

أنَا اللِى وَحْدِى بَاعِيش مَا لِىَّ صُحْبَه وبيت

واللِى مَا بْيََدِّيش كَان نِفسِى اكون مَا بَقِيت

أنَا اللى مَافهمْتِنِيش لَمَّا مَعَاكِى حَكِيت

واللى مَا سْمِعْتِنيش لَمَّا عَلِيكى نَادِيت

ولا حَتَى شُوفتِينِى حِينْ انَا مَرِّيت

ولا سَمَّعْتِينى صَدَى حِيْن انَا غَنِّيت

يا دُنيَا جَايَّالى تَانِى بَعْد مَااسْتَغنِيت

وبِعِدْت عَنِك خَلاص وبقلِيلى رِضِيت

رُوحِى وسِيبِينى ف حَالِى

يَارِيت بَقَى… يَا رِيت

يا دُنْيَا مُش عَايِزَه حَاجَه

مِنِّك… خَلاص مَليت.

راهب

رَاهِب وعَايِش ف مِحْرَاب ذاتِى

عَابِد ومِْتعَبِّد فى مَغَارة الرُوُح

عَاشِق ومِتعَشَّق نَفَسِى بِالفضَا

رَاغِب ومِتمَّعْشَق فى جِبَال النور

يا نَبْع شَارْبَه مِنْ حَنَانُه بُحُور

يا حَبِّة عِشْق ف أرْض الرِضَا مَبْدُور

كل مَا يِرْوِيها الهَوَى

تِطرَح ثِمَار مِن نورْ.

م المَشْرَبِية

م المَشْرَبِيه مَارْقَه خُيُوط الشَمْس

تِتسَرْسِب غَنَاوِى

فى المَشْرَبِيه يِحْلىَ القعَاد

وِسْط الحَكاوِى

فى المَـشْـرَبـِيه تـُقعُد

وإنتَ فى عُمْر الصِبَا

تِرْسِم الأحْلام

لَو كنت غَاوِى .

عِشْق ومِيْل

الكِلمَه بَعْد الكِلمَه

لازِم تقول مَعَْنى

والدَمْعَه لمَّا تسِيل

وَرَاهَا مِيِت مَعْنَى

والحُزْن لَو بِالكِيل

الأرْض مَا تسَاعْنا

والحُب عِشْق ومِيْل

فى الغربَه يِوْجَعْنا

يِصَاحِبْنا فِين مَا نرُوح

لَو توهْنا رَجَّعْنَا

نِشْتَاق لِحُضْن حَبيب

مِسِيُره يِجْمَعْنا

قـَالـُوا السَعَادَة

قـَالـُوا السَعَادَة فى الهَوَى

ومَـفـِـيش هَوَى

رَيّح قـُلوب عُـشَّاق

قـَالـُوا السَعَادة فى الرِضَا

ولا فِيه رِضَا

طوُل مَا النفوس تِشتاق

تطول بِاليَد السَمَا

ونِجْمَهَا البَرَّاق

طول مَا الحَبَايِب يِعْزِفوا

لحْن الفرَاق

………….

أَصل السَعَادَه كلهَا

ف رَاحِة الضَمِير …

والبَال فى يُوم لو رَاقْ.

مَهْر أيامى

لو كنت عَايِز تِدْفع

مَهْر أيامِى

إيَّاك تِحَاوِل تِكبَح

مُهْر أَحْلامِى

إيَّاك تِحَاوِل تِهد

لحْظة فِى كَيَانِى

إيَّاك تِحَاوِل تِغَيَّر

لون الصُورَه قدَّامِى

وللا تحَاوِل تمَرَّر

طعْم الفرْحَه فى لِسَانِى

ولمَّا أَحْتَاجْلك ألقاك بعِيد

وألْقَانِى

وِسْط مشْوَار الحَيَاه….

وَحْدَانِى.

تغرِيِبة

لَومَعَندَكشِ صَبْر فى الحَيَاه

إزْرَعُه

لَو مَعَندَكشِ رَأى مِن أَهله

إسْمَعُه

لَو مَاعَانِدَكشِ الحَبِيب ف حُبُه

إشْتِرِيه

لَو مَاطاوْعَكشِ قَلْبَك

فى البُعْد عَن اللى جَرَحَك

مِن ضُلوعَك

إقلَعُه

معَ الْمَعْنَى

عَايْشِين مَع المَعْنَى

فى زَمَان مَالوش مَعْنَى

وقلوب بِتِوْجَعْنَا

مِن شُوقهَا لِلحَنَان

عَايْشِين مَعَ الدُنيَا

ومُش هِىَّ دُنيِتنَا

حَاسِّين بغرْبِتنَا

واللى مِسَكـِّتنَا

مَفِيش سِكَك تَانْيَه

غِير سِكِة الأَحْزَان.

شَبَه روحي

ولِيه رُوحَك شَبَه رُوحِى

ولِسّه مَا بيننا فِيه فُرْقَه

ولِيه بِإيديك دَوَا جُرُوحِى

وتِبخل عَنى بالصُحْبَه

ولِيه عَايِش سِنيِن خَايِف

بشُوق بَرْدَان مِنْ الوِحْدَه

حُصَان الحِلم لِيه وَاقِف

يدُق سِنيِن عَلى بَابَك

وَلا أَنتَ سَامِع الدَقّه؟!

إفرِد للهَوَى قلوعَك

فى بَحْر عُيُونِى مَاتخَافشِى

وحِب اللِى عِشِق قَلبَك

وصُون مَن فى الغَرَام صََانَك

وإنْسَى اللى نِسِى وخَانَك

وأسْكن قَلبى ونا أعِيشْلك

وأغَطِيك م الهَوَى برِمشِى

وأَحَلي لك مَرَار عُمْرَك

وم الأيام ماتِقلقشِى

مادَام رُوحَك شَبَه رُوحِى

خَلِيك جَنبِى…

مَاتِبْعِدشِى.

العُمْر … فُصُول

الصُحبَه لو عِز الشِتَا تَحْت المَطر

جُوَاك رَبِيِع

والحُزْن لو عِز الرَبِيع وِسْط الزُهُور

جُواك شِتَا

والوِحْدَه وانتَ وِسْط النَاس

إحْسَاس مُخِيْف

تِحِس قلبَ فِيه جَلِيد

حَتَى فى عِز الصِيف

…………………….

مِين الِلى قال العُمْر له رَبيع وَاحِد ؟

مِين الِلِى قال…

آخِر العُمْر يِبْقى خَرِيف ؟

إنْشقّ القلب

إِنشَق القَلب إِنقَسَم إتنِين

نُص لََقِيته هِنَا فِى ضلوعِى

والتَانِى رَاح فِين ؟!

إنقسَم القلب لشُوق وحَنِين

شُوق حَسِّيته أَنَا فِى قلبِى

مَاعْرَفشِ مِنِين

شُوق دَوِّبْلِى سِنين رَاحِت

وسِنين جَايِّين …

هُوَّ انتَ يا قَلبِى هَاتِبْقى

كِدَه لإمْتى

وَحْدَانِى حَزِين.

وَلو حَسِّيت

ولو حَسِّّيت بقيت مِنِّى

تَعَا رِيْحِى هِنْا وغَنِّى

تَعَا نِحْلم سَوا ببُكرَة

ورَوِّحْ اللاحْزَان عَنِّى

تَعَا نقسِم سَوَا اللقمَة

وانا اَدِّيْلك صِبَا سِنِّى

ودَنْدِنْلِى غَنَاوِى الشُوُق

ولَو غَنِّيْت انَا اسْمَعْنِى

تَعَا نِغْزِل سَوَا الفَرْحَه

تَعَا دَا القَلب مِسْتَنِّى.

أنا الِلِّى

أنا الِلى سَاكْنَه فى شقوق رُوُحَك

أنَا الِلى بَاجْرِى فى دِمَا عُروقََك

أنا الحِلم الِلى حلِمْته طول عُمْرَك

أنا الدَمْع الِلى سَال مِن عَلى خَدَك

والغِنوَة الِلى لَحْنَها مَحْفور فِى وِجْدَانَك

أنا الِلى حَبْيتهَا سِنين فِى خَيَالك

سَلمْهَا وانتَ مِطمِن لِجَام خَيَّالك

ضَيَّعْت عُمْرَك توَاعِدْنِى فى أحْلامَك

والحِلم مِتفسَّر قدَّام عُيُونَك

وليه لِسَّه بتخَاف …

م الْقَلب الِلى لو حَبِّيته…

لا يُمْكِن يُخُونك؟!

حنِين

حَنِين قادِر ومِتمَكن

يطوف جُوَّة الضُلوع يسْكن

يِرَقّّّـَّص دَمْعَه عَلى جِفْنِى

وتِبْهَت ضحْكَة عَلى سِنِّى

ينَسِّينى أعِيش سِنِّى

…………………..

حَنِين حَاكِم ومتحَكِم

يهِز الصَمْت مَاتكَلِم

وتطلع م الحَشَا آهْه

تِخَلى الصَخْر يتألم

………………….

حَنِين جُوَّايَا آه مِنُه

كلْ مَا ارُوح بعِيد عَنُه

أعُود مِن تَانِى واسْتَسْلم

برُوح طِفْلَة..

حَاسِب عَلى قلبِى

م النَظرَة لو جَارْحَه

حَاسِب عَلى مشَاعْرِى

م الكِلمَه لو قَاسْيَه

حَاسِب عَلى ضِلى

م الخَطوَة لو بَاعْدَه

حَاسِب عَلى وَرْدِى

م النِسْمَه لو شَارْدَه

حَاسِب عَلى شَطي

م المُوجَه لو غَادرة

حَاسِب عَلى قلوعِى

م الرِيح لَتِتمَزّق

حَاسِب عَلى ضلوعِى

من قسْوِة الْضََمّه

حَاسِب عَلى ايَامِى

ليْمُوت بْهَا بُكرَه

حَاسِب عَلى رُوحِى

مَابَحِبْش العَتمَه

حَاسِب مِنَك عَلىَّ

حَاوِل تقَرَب لِىَّ

دانا مَهْمَا عُمْرِى كِبِر

هَافضَل فى الحَيَاه

عَايْشَه برُوح طِفلَه !

عَبْيِد الذِكْرَيَات

لا مِننا وُلاد بُكرَه

وَلاَ ولاَد الِلى فَات

أوقات بنبِيع فِى بُكرَه

بِحَبِة ذِكرَيَات

وسَاعَات كِتِير بنِكرَه

تِنسَانا الآهَات

نِعِيش فِى ضِلْ ذِكرَى

مَاضِيهَا رَاحْ ومَات

ونخَاف لَو جَتنَا فِكرَه

تِرمِى لنا طوق نَجاة

يوُعِدْنَا بدُنيَا حِلوَه

وفَرْحَه فِى فجْر آتْ

ويَاخُدْنَا الحِلم لحْظه

مَعَاهَا ندُوب ونِحْيَا

ونِصْحَى بحَقِيقه مُرَّه

لمَّا نِبيعَك يَا بُكرَه

ونِشْتِرى اللى فات

سَامِحْنا يا بُكرَة مَاحْنا

عَبِيد لِلذكرَيَات!

برىء الوِدّ

شُوك الوَرد لو يجْرَحَك

إشْفِى الجرَاح بالوَرْد[/center][/center]

أكـون مـَجنـُون

لمَّـا باعـِّدى حـدُود الشَـكل للمَـضْمُـون
باغـُوص قـوِى فى قـلب السِـر والمَـدفون
واشُـوف بالقـلب ولوحتى كـفـيف لعـيُـون
ومـن دون الكلام اسـْمَـع حوار الكـون
واشـعُـر بالبعـيد عـنى ولو مَـحْـزون
ياخُـدنى السِـر يرمِـينى فى بحر شُـجُـون
واشُـوف الدُنيا من زاويـة حقـيقـية
لا فـيها خـَيال ولا أوهَـام ولا بها ظـُنـُون
واشـُوفـها دُنيا خـَيالية
دم العرب
دم العرب هدروه

والكل وقفوا خـُـرس

حتى الصراخ نسيوه

والصرخة صبحت همس

محتار يا دم العرب

بين البقاء والطمس

مشنوق يا فجر احلامنا

على جراح الأمس

وإمتى يا بكرة هاتيجى

وتجيب لنا معاك شمس

ملعون يا جبن الحزانى

الآهة مَجْنُونَة

مَفِيش أَلَم عَاقِل
ولا جَرْح لُه مَعْنَى
ولا حَاجَة تِسْتَاهِل
تِجْرِى لْهَا يَا دْمُوعْنَا
والآهَة مَجْنُونَة
نِكْتِمْهَا تِوْجَعْنَا…
نِطْلِقْهَا تِوْجَعْنَا
مَكْتُوب عَلِينا كِدَه
نِعْيش بأَوجَاعْنَا

مش هانرجع

مش عشان القلب انجرح مرة
هانتوب عن الهوى
ولا عشان الحلم ضاع منا
هانبطل الأحلام
ومش عشان الزيف بيكتر
يبقى نكدب فى الكلام
مش عشان يقسى القريب
يبقى الكون مافيهوش حنان
مش عشان صاحب يخون
يبقى ع الدنيا السلام
ومش عشان حروب تقوم
يبقى خلاص مفيش سلام
ومش عشان بارت سنيننا

عرفت من الكاتب شكرا لمجهودك يا استاذنا

الشاعرة جيهان الشعراوى شاعرة تكتب بالعامية
المهم ايه اخبار منين اجيب ناس ياترى هنشوفها ولا.......

» بنت مِـين فِى مَـصر ؟!
» من ابداعات الشاعرة ايمان بكرى
» من ديوان فلسطين داري
» ديوان الشاعر نزار قبانى
» من ديوان لمن يهمه الامر ( الشاعر فتحى ابو الحمد )